കോഴിക്കോട്: രാത്രി വീട്ടില്‍ വന്നുകയറിയ അപരിചിതരായ സ്ത്രീയും പുരുഷനും വീട്ടമ്മയെ കത്തികാണിച്ച് സ്വര്‍ണ്ണ മാല കവര്‍ന്നു. കക്കട്ടിലിലാണ് നാടിനെ നടുക്കിയ സംഭവം നടന്നത്. ഇന്നലെ അര്‍ദ്ധരാത്രിയോടെ അമ്പലക്കുളങ്ങര-നിട്ടൂര്‍ റോഡിലെ ഒരു വീട്ടിലാണ് സ്ത്രീയും പുരുഷനും ബൈക്കില്‍ എത്തിയത്.
ഈ സമയം വീട്ടമ്മ മാത്രമായിരുന്നു അവിടെ ഉണ്ടായിരുന്നത്. തങ്ങൾക്ക് ശുചിമുറി ഉപയോഗിക്കാൻ സൗകര്യം ചെയ്യാമോ എന്ന് ഇവർ വീട്ടമ്മയോടെ ചോദിക്കുകയായിരുന്നു. ഇതനുസരിച്ച് ബാത്ത് റൂം കാണിച്ചു കൊടുത്തപ്പോൾ വീട്ടമ്മയോടും കൂടെ വരാൻആവശ്യപ്പെട്ടു. ഇതനുസരിച്ച് സ്ത്രീക്കും പുരുഷനും പിറകേ പോയ ഗൃഹനാഥയെ ഇരുവരും ചേർന്ന് കത്തികാണിച്ച് ഭീഷണിപ്പെടുത്തുകയും കഴുത്തിലെ സ്വർണമാല പൊട്ടിക്കുകയുമായിരുന്നു.
ബഹളം കേട്ട് നാട്ടുകാർ ഓടിക്കൂടിയപ്പോഴേക്കും ഇരുവരും വന്ന ബൈക്കിൽ സ്ഥലത്ത് നിന്നുംരക്ഷപ്പെട്ടു. വിവരം അറിഞ്ഞെത്തിയ കുറ്റ്യാടി പൊലീസ് നടത്തിയ വിശദമായ പരിശോധനയിൽ സ്വർണ മാലവീട്ടുമുറ്റത്ത് നിന്നുതന്നെ കണ്ടെത്തി. പിടിവലിക്കിടെ മാല നിലത്ത്വീണുപോയതാണെന്ന് കരുതുന്നു. പൊലീസ് കേസെടുത്ത് അന്വേഷണംആരംഭിച്ചിട്ടുണ്ട്
